SciTech Publishing Corporation (Pvt) Ltd.
පිටස්තරයා-විද්‍යා ප්‍රබන්ධය

පිටස්තරයා 8

“ඉතින් චාලි අපි මොකද මේ ගැන කරන්න ඕන?” අද්මිරාල් රිචර්ඩ් බවර් සිය මිතුරු ජනරාල් චාල්ස් වෙලිංටන්ගෙන් බොහොම බැරෑරුම්ව ඇසුවේ මදුවිතක් වත්කරගන්නා අතරතුරේ දී ය.

“අපි කෝකටත් මේ පුද්ගලයාව තව තවත් පරීක්‍ෂා කරලා බලමු…. ඒජන්තයෝ දෙන්නෙක් මේකට දැම්මා කියලා අපට ලොකු පාඩුවක් වෙන්නෙ නෑ… මේක ඇත්තෙන්ම බොහොම වැදගත් මාතෘකාවක්… සමහර විට අපි නොදන්න බොහෝ දේවල් මෙයාගෙන් බලා ගන්න පුළුවන් වේවි කියලා මට හිතෙනවා. ඒ නිසා මේ වැඩේ අපට පාඩුවක් වෙන එකක් නැහැ. මොකද මේ වගේ පුද්ගලයො තමයි අපට අවශ්‍ය, අපට පුළුවන් නම් මෙයාව අපේ පැත්තට ගන්න… ඒක එක පැත්තකින් ලොකු වාසියක්. ඒ වගේම මෙයා අධ්‍යයනය කරලා මේ වගේ වෙනත් මිනිස්සුන්ගෙ හැසිරීම කොහොමද කියලා ආකෘතියක් හදන්නත් අපට පුළුවන් වේවි…”

“ඒක නෙවෙයි රික්… ඔය ලැබ් එකේ  තව ඇබෑර්තු නැද්ද?” ජනරාල්වරයා එකපාරටම ඇසුවේ යමක් මතක් වූ ආකාරයෙනි.

“දැනට නම් විද්‍යාඥයින්ගේ ඇබෑර්තු ඔක්කොම පිරිලා තියෙන්නෙ… නමුත් අපට තව කෙනෙක්ගෙ අවශ්‍යතාවය තියෙනවා ක්වොන්ටම් ගණනය කිරීම් කරන්න සහ ආකෘති විශ්ලේෂණයට… ඔබ දන්න කියන කෙනෙක් ඉන්නව ද? හැබැයි මේක ඒ තරම් ආකර්ෂණීය රස්සාවක් නෙවෙයි… සාමාන්‍ය විද්‍යාඥයෙකුට ලැබෙන පඩිය වගේ ලොකු පඩියක් ලැබෙන්නෙ නම් නැහැ… නමුත් වැදගත් පඩියක් ලැබෙනවා…”

“බලමු…” ජනරාල්වරයා නැවතත් නිකටට තට්ටු කරමින් කල්පනා කළේ ය.

දිනය: බදාදා

ප්‍රගති සමාලෝචන රැස්වීම අවසන සියලු ම දෙනාගෙ අවධානය බිඳුනෙ නාවික පර්යේෂණ ආයතනයෙ ප්‍රධානියා තවත් පියකරු යුවතියක් සමඟ රැස්වීම පැවති කාමරයට පැමිණීම නිසා….

“සුභ සවසක් අද්මිරාල් තුමනි, මොකද මේ පැත්තෙ නොදන්වාම? ”

සාමාන්‍යයෙන් මෙවැනි රැස්වීම් සඳහා අවම වශයෙන් සහභාගි වන අද්මිරාල් තුමාගෙ පැමිණීම හැම දෙනාටම ප්‍රශ්නයක් වූවා විතරක් නෙවෙයි ඔහු සමඟ පැමිණි යුවතිය ගැනත් ගැහැණු පිරිමි භේදයක් නොමැතිව අවධානය යොමු වුණා. පිරිමින් නම් බැලුවෙ අලුත් යුවතියගෙ ලස්සන වුවත් මෙගනුත් සිමෝනාත් බැලුවෙ තමන්ට වඩා ලස්සන මේ කෙල්ල මොනවට අද්මිරාල්තුමා සමඟ මෙතැනට ආවද කියලා… සාමාන්‍යයෙන් වයසක බලවත් පිරිමින්ගේ ඇඟේ එල්ලෙන සරාගී ගැහැණු හිටියත් මේ වගේ ප්‍රසිද්ධියේ අද්මිරාල් තුමා කෙල්ලක් අරන් ආවෙ ඇයි ද කියන ප්‍රශ්නය කාටත් ඇති වූවා… පෙනෙන විදියට දෙන්නා හොඳට අඳුනන පාටකුත් තිබෙනවා…

“අද මම තකහනියක්ම මේ රැස්වීමට ආවෙ විශේෂ කාරණයකට, මම මේ කියන්න යන දේ ගැන ආචාර්ය ෆියු සහ ආචාර්ය ලිපර්ඩ් දෙදෙනා එක්කත් සාකච්ඡා කරලයි තීරණය ගත්තෙ. ඔබ හැම දෙනාම දන්නවා ක්වොන්ටම් යාන්ත්‍රික ගණනය කිරීම් සහ ත්‍රිමාණ අනුරූපණ අතින් අපේ රසායනාගාරය සිටින්නෙ තරමක් පසුගාමී තත්ත්‍වයක. මම ඒ ගැන ඔබට දොස් කියන්නෙ නැහැ. මොකද ඔබට තියෙන වැඩ කන්දරාවත් එක්ක ක්වොන්ටම් යාන්ත්‍රික ගණනය කිරීම් කරන්න කියලා අපට බල කරන්න අයිතියක් නැහැ. මේක ඇත්තෙන්ම වෙනම රැකියාවක්, ඉතින් අපි ඔබට වැඩ පහසු කර ගැනීම සඳහා ගණනය කිරීම් සිදු කිරීම සඳහා ම දක්‍ෂකම් දක්වන අලුත් සාමාජිකාවක් කණ්ඩායමට එකතු කරන්නට අදහස් කළා… ඒක පර්යේෂණාගාරයේ ලිංගික සමබරතාවය (Gender balance) එකටත් එක්ක හොඳයි කියලා අපි හිතුවා. මේ මාත් සමඟ සිටින මොලී ජේන් රියෝර්ඩන් මැසචුසෙට්ස් තාක්‍ෂණික සරසවියෙ ආචාර්ය උපාධිධාරිණියක්, ඇගේ ප්‍රවීණත්‍වය තිබෙන්නෙ ක්වොන්ටම් ගණනය කිරීම් සහ ත්‍රිමාණ අනුරූපණය සඳහා.. ඉතින් තවත් කතා මොනවට ද? අපි ඔබට අලුත්ම සාමාජිකාවක් ලබා දුන්නා.. ඔබේ කටයුතු සියල්ල ඇයත් සමඟ සාකච්ඡා කර සහයෝගයෙන් කටයුතු කරන්න…. ඇගේ දායකත්‍වය වෙන්නෙ ඔබේ පර්යේෂණවලින් ලැබෙන දත්තයන් ගණනය කිරීමෙන් ලැබෙන දත්තයන් සමඟ සමපාත කිරීම මගින් ඔබේ පර්යේෂණවල නිරවද්‍යතාවය නැවත වතාවක් තහවුරු කිරීම. ඒ වගේම ඔබ සියලුම දෙනා දන්නවා අපට නාස්ති කරන්න කාලයක් නැති බව… ඒ නිසාම ගණනය කිරීම් මගින් සහ ත්‍රිමාණ අනුරූපණ මගින් ලැබෙන ආකෘති ඉදිරියට ගෙනයෑම මගින් සෑහෙන වෙලාවක් ඉතිරිකරගෙන කාර්යක්‍ෂමතාවය ඉහළ නංවගන්නත් අපට මේ නිසා පුළුවන් වෙනවා. මතක තියාගන්න අපි බලන්නෙ ඔබේ පුද්ගලික ජයග්‍රහණ නොවෙයි… අපි සියලුම දෙනා එක කණ්ඩායමක්, අපි සියලු දෙනාගෙ ජයග්‍රහණ පුද්ගලිකව සිදු කරන පර්යේෂණ මත රඳා පැවතුණත්, අපි ජයග්‍රහණය කරන්නෙ එකමුතුව නැගී සිටියහොත්,… මට ඒ ගැන වැඩිහිටියන් වෙච්ච ඔබට අමුතුවෙන් කියා දෙන්න අවශ්‍ය නැති බව ඔබ දන්නවා… ඉතිං… හොඳට වැඩ කරගෙන යන්න…. අපි සෑහෙන සොයා ගැනීම් කරලා තිබෙනවා මේ පර්යේෂණාගාරයෙන්… මට අවශ්‍ය ඒ දේ තව තවත් වැඩි දියුණු කරවන්නයි… තේරුණා නේද? ”

සියලුම දෙනා එකාවන්ව හිස සැලූයේ තමන්ට ලැබුණ විධානයන් පමණටත් වඩා හොඳින් තේරුණ බව අඟවමිනි.

සාමාන්‍යයෙන්  කාර්යක්‍ෂමතාවය සහ ඵලදායීතාවය පිළිබඳ ඉතා සැලකිල්ලක් දක්වන රසායනාගාර – ආයතන මෙන්ම කර්මාන්තශාලා ද සිය පර්යේෂණයන් සිදු කිරීමට මත්තෙන් ඒ සියලු පර්යේෂණ තත්ත්‍ව පරිගණක ආශ්‍රයෙන් ගණනය කිරීම්වලට භාජනය කර වඩාත්ම උචිත පර්යේෂණ තත්ත්‍ව තෝරා ගනු ලබයි. මෙසේ කරන්නේ  අහඹු ලෙස තෝරා ගන්නා පර්යේෂණ තත්ත්‍ව සහ වැරැදි පර්යේෂණ තත්ත්‍ව පසුපස ගොස් කාලය කා දැමීම මගින් සිදුවන හානිය වළකා ගන්නටයි. බොහෝ ඖෂධ සමාගම් සහ රසායන ද්‍රව්‍ය නිෂ්පාදන සමාගම් දැන් දැන් මේ ක්‍රම භාවිත කරයි. මේ නිසා  ඒ සමාගම්වලට සිදුවන ලාභය ඩොලර් මිලියන ගණනක්. ඒ සියල්ල ගණනය වන්නේ වැයවන රසායන ද්‍රව්‍ය සහ අපතේ යන මිනිස් පැය ගණන මගින්. ඉහළම තත්ත්‍වයේ ඇති ආණ්ඩුවේ රසායනාගාර පවා දැන් දැන් මේ ක්‍රම අනුගමනය කරන්නේ එයින් බොහෝ වාසි ලබා ගත හැකි නිසයි.

“මොකද හිතෙන්නෙ අලුත් කෙල්ල ගැන.. ? ”

“පසුදා උදෑසනම රසායනාගාරයේ කුස්සියෙදි කෝපි කෝප්පයක් වත්කර ගන්න අතරේ බිල් ඇසුවෙ මයික් ගෙන්….”

“මොනවා හිතන්නද? ආයෙ හෝදන්න දෙයක් නෑ…. ඔය ඉන්නෙ……….”

“මට හිතෙන විදියට නං එයාට කොල්ලෙක් ඇති… ඔය වගේ කෙනෙක් සාමාන්‍යයෙන් ඉතිරි වෙලා තියෙන්න විදියක් නෑ….”

“කොල්ලෙක්ද කෙල්ලෙක්ද දන්නෙ නෑ….” දෙදෙනාම මහ මහ හඬින් සිනාසෙන්නට විය.

“මොකද දෙන්නගෙ  හිනාව?” සිමෝනා ද  එසේ අසමින් ම කුස්සියට  පැමිණියා ය.

“නෑ මේ අලුත් ගෑණු ළමයා වැඩට යොදා ගන්නෙ කොහොමද කියලා සාකච්ඡා කළේ….”

“අනේ මේ…. මම නොදන්නවයැ දෙන්නගෙ සාකච්ඡා….. මම එකක් කියන්නං… ගෙරි මස් කනකොට බෙල්ලෙ බැඳගෙන කන්න එපා හරිද? මේක ඇතුළෙ සම්බන්ධතා තියාගෙන ඒවා කඩාකප්පල් වුණොත් දෙන්නටම එකිනෙකාට මූණ දෙන්න බැරි වෙයි…. ඒකයි කියන්නේ කාර්යාලීය ප්‍රේමය (Office Romance) දැලි පිහියෙන් කිරි කනවා වගේ වැඩක් කියලා.. අනික, උඹලා දෙන්නම කිසිම දෙයක් සීරියස් කරන්නෙ නැති බව දැන දැනත් ඔය වගේ වැඩවලට නං ගෑවෙන්න එපා.. මම දෙන්නගෙම හොඳට කියන්නෙ… මේ මම වගේ පිටින් එකෙක් හොයා ගන්නවා… කිසි ප්‍රශ්නයක් නෑ… දවස තිස්සෙම කතා කරන්නවත් විදියක් නැති නිසා ගෙදර ගියාම උපරිම සැලකිලි ලැබෙනවා….”

“ආ…. අපි නොදන්නවයෑ ඒක………….”

“ඒක නෙවෙයි…Office Romance ගැන කතා කරනකොට මතක් වුණේ…. මොකද අර මෙගන් විශ්ව ගැන වැඩිපුර හොයන්නෙ? මිනිහවත් දැලේ දාගන්න ද? ”

“ඒ වගේ තමයි…. ගිය සතියෙ අපි කන්න එළියට ගිය වෙලේ යනකං හරස් ප්‍රශ්න… දැක්කනේ කන වෙලාවෙත් අහපු දේවල්…. මම හිතන්නෙත් මෙගන්ගෙ පොඩි කැමැත්තක් තියෙනවා විශ්ව ගැන. ”

“ඇයි යකෝ අපි ඔටුවො ද? මෙච්චර කලක් අපි මේ ලැබ් එකේ හිටියා මෙගන්ට ඕනකම තිබුණා නං අපි දෙන්නගෙන් ඕන කෙනෙක් සපෝට් එකක් දෙනවනේ… අලුතෙන්ම පොරක් එනකං බලං හිටියේ… අපරාදෙ ජීවිතේ… බිල් එසේ කිවුවෙ විහිළුවට, මෙගන් කියන්නෙ කවුද කියලා හොඳටම දන්න නිසා.”

“දන්නවනේ මෙගන්ගෙ හැටි…. හරිම High Maintenance……… එයාව ආම්බාන් කරන්න ඉතිං උඹට රස්සා දෙක තුනක් කරන්න වෙයි… උඹට පුළුවන්ද  මෙගන්ට  Prada අත් බෑග් අරන් දෙන්න හැම මාසෙම….. ඔන්න පුළුවන් නං සෙට් වෙයං….. අන්තිමට උඹට Bankruptcy file කරන්නයි වෙන්නෙ…..”

“කවුද  Bankruptcy file කරන්නෙ? ” විශ්ව ද කුස්සියට පැමිණෙන අතරේ තිදෙනාගෙන්ම ඇසුවේය.

“විශ්ව මේ…. මම උඹේ හොඳට කියන්නෙ…. වැරදිලාවත් මෙගන්ට නං සෙට් වෙන්න එපා පුතෝ…. උඹේ සේසතම ඉවර වෙයි බෑග් අරන් දීලා….”

“ස්තූතියි බිල්… මගේ එහෙම නං අදහසක් නෑ… දන්නවනේ ඉතිං මේක ඇතුළෙ ඔහොම දේවල් තියා ගත්තාම කරදරයි කියලා…..”

“පටන් ගන්නෙ ඔහොම තමයි පුතා… දන්නෙම නැතුව උඹ ඒකට වැටිලා තියේවි… මෙච්චර අපි හිටියා… අපි ගැන ඇහැක් ඇරලා බැලුවද? උඹ ආවා විතරයි උඹ ගැන මාර සැලකිල්ලක් දක්වන්නෙ… අඩුම ගානෙ එක දවසක් අපෙන් ඇහුවද කන්න එළියට යං කියලා… උඹ ඇවිල්ලා සතියයි ගියේ… කෙල්ලම වචනෙ දැම්මනේ…. නැද්ද මයික්…”

“ඒක තමයි…. ඔන්න අපෙන් නං උඹේ ප්‍රේමය ආම්බාන් කරන්න ණය ගන්න එන්න එපා…. හරිද? ”

“කොහොමද විශ්ව ඔබ කියන්නෙ මේ ආකෘතිය වැරැදියි කියලා? ”

“නැහැ, මම කියන්නෙ නැහැ මේක සම්පූර්ණයෙන්ම වැරැදියි කියලා… නමුත් මේකෙ අඩුපාඩු තියෙනවා….”

“කොහොමද එහෙම කියන්නෙ? මේක මීට ඉස්සර වෙලා අපි කොච්චරක් නම් අත්හදා බලලා තියෙනවද? කාටවත් එහෙම දෙයක් අහු නොවුණ එකේ ඔබ විතරක් කොහොමද කියන්නෙ මේ ආකෘතියෙ අඩුපාඩු තියෙනවා කියලා? ”

“හරි, මෙන්න මේකයි මයික් අඩුපාඩුව… මේ අපි අත්හදා බලන චන්‍ද්‍රිකා ක්‍රියාත්මක වෙන්නෙ කොහෙද? ”

“පිටත වායු ගෝලයේ” (Exosphere)

“හරි… දැන් කියන්න බලන්න අපේ චන්‍ද්‍රිකා ස්ථාපනය කරන්න යන්නෙ කොතැනද කියලා…”

“පිටත වායු ගෝලයේ ක්ලාක් කක්‍ෂයෙ (Clark Orbit) පහළ ස්ථරයෙ. ”

“ඔතැන සංයුතිය මොකක් කියල ද ගණනය කිරීම්වලදි උපකල්පනය කරන්නෙ? ”

“එතැන දී උපකල්පනය කරන්නෙ වායුගෝලීය අවකාශය පරිපූර්ණ වායුවක් (Ideal Gas) ලෙස හැසිරෙනවා කියලා…”

“හරි…… එතකොට ඉස්සර මේක අත්හදා බලපු අය පිටත වායු ගෝලයේ සංයුතිය විදියට ගත්තෙ මොකද්ද? ”

“සාමාන්‍ය පිටත වායු ගෝලයේ සංයුතිය: හයිඩ්‍රජන් සහ හීලියම්; අපට ජාත්‍යන්තර අභ්‍යවකාශ මධ්‍යස්ථානයෙන් ලැබෙන දත්තවලින්. ”

“දැන් මේ වායු ගෝලයේ සංයුතිය නිසා, අපි උපකල්පන දෙකක් කරනවා…

  1. ඉහළ අවකාශයේ අංශු ප්‍රමාණය නොසැලකිය හැකි තරම් නිසා ඒවා අතර පරමාණුක ඝට්ඨන නොසලකා හැරීම
  2. ඒ පරමාණු හෝ අංශුන් කිසිදු ඝට්ඨනයකට ලක් නොවී පරිපූර්ණ රේඛිය පථයක ප්‍රක්‍ෂෙපණය වන බව

හරිද? ”

“ඔව්…. දැන් විශ්වගෙ තර්කය මොකද්ද? ”

“තර්කය වෙන්නෙ මෙන්න මේකයි මයික්….”

“මේ පිටත අවකාශයේ ප්‍රමාණය තීරණය වෙන්නෙ සූර්ය ක්‍රියාකාරීත්‍වය මත, සමහර කාලවලදි මේ  පිටත අවකාශයේ සංයුතිය වෙනස් වෙන්න පුළුවන්. ඒත් අපි මේ සංසිද්ධිය නොසළකා හැර තිබෙනවා. ඒ වගේම සූර්ය ක්‍රියාකාරීත්‍වය වැඩි කාලවල දී පිටවන අංශු ප්‍රමාණය අර අපි උපකල්පනය කළ නොසළකා හැරිය හැකි ප්‍රමාණය ඉක්මවා යනවා..  වායු ගෝලයේ සංයුතිය වෙනස් වෙද්දිත් මේ පිට වායු ගෝලයේ සංයුතිය වෙනස් වෙනවා… අපි මේ කරුණු නොසළකා හැර තිබෙනවා… මෙන්න මෙතැනදි අපි කිසියම් නිවැරැදි කිරීමක් කළ යුතුයි…”

“පරිපූර්ණ වායු සමීකරණයේ පරිමාව සහ පීඩනයට අපි කරන නිවැරැදි කිරීම් වගේ නිවැරැදි කිරීමක් අපට මේ සඳහා යොදන්න බැරිද? ”

“පුළුවන්, නමුත් කවුද මේ ගණනය කිරීම් කරන්නෙ? අපි දෙන්නටම ඒවා කරන්න වෙලාවක් නැහැ…”

“අමතක වුණාද? ඒකට තමයි අද්මිරාල් බවර් අලුතෙන්ම ගෑනු ළමයෙක් එවුවෙ… දෙයියො එව්වා වගේ ඔය ඇවිත් ඉන්නෙ… අද්මිරාල් කිවුවෙ පුළුවන් තරම් වැඩ ගන්න කියලා… ඉතිං ගමු….”

“යමු…. අදම මේක කර ගත්තොත් අපට මේ සතිය වෙනකොට නිගමනයකට එන්න පුළුවන් වේවි…”

“ඒ වන විටත් මොලී සිටියේ කිසියම් ත්‍රිමාණ අනුරූපණයක් පරිගණකයේ ක්‍රියාකරවිමිනි….”

“හලෝ මොලී…. අපට ඔයා එක්ක ටිකක් කතා කරන්න පුළුවන් ද? ”

“සත්තකින්ම…. එන්න…. වාඩිවෙන්න……”

“මේ අපේ විශ්ව පොඩි තර්කයක් ගේනවා අපේ පැරණි පර්යේෂණවල අඩුපාඩුවක් ගැන… අපිට මේ ගැන කතා කරන්න පුළුවන්ද? මොකද අපි හිතන්නෙ මේ උපකල්පන සංශෝධනය කළොත් සමහරවිට නිවැරැදි  අගයක් ලබා ගන්න පුළුවන් වෙයි කියලයි.. ඒකට ඔයාගෙ ගණනය කිරීම් අත්‍යවශ්‍ය වෙනවා…”

“ඔව් පුළුවන් වෙයි…. හැබැයි මට විස්තර කරලා කියන්න… තවම මේ ගණනය කිරීම් මට පොඩ්ඩක් අලුත්….”

“කිසි ප්‍රශ්නයක් නෑ.. විශ්වගෙ තමයි අදහසත්, විශ්වම විස්තර කළා නම් හොඳයි…”

“මේකයි මොලී… දැන් අපේ පර්යේෂණ කරන චන්‍ද්‍රිකා රඳවන්නෙ  පිටත අවකාශයේ. නමුත් අපි මේ කටයුතු ත්‍රිමාණ අනුරූපණ කරනකොට සමහර සාධක මඟහැර තියෙනවා කියලා මට හිතෙනවා. අපට ඕන මෙන්න මේ සාධකත් ඇතුළත් කරලා ඒ ගණනය කිරීම් කරන්නයි. ඊට පස්සෙ අපේ ගණනය කිරීමෙන් ලැබුණ කරුණු ප්‍රායෝගිකව අනුරූපණය කරන්න පුළුවන් වේවි. ”

“දැන් මොනවද ඔයා කියන සාධක? ”

“විශ්ව ජීවිතයේ මුල්ම වතාවට ඒ තරම් සුන්දර නිල් පැහැති දෑසක් දුටුවේ එදාය …. තමන් කෙතරම් කෙල්ලන් දැක ඇතත්, මේ තරම් කතා කරන දෑසක් හමු වූයේ නැති බව ඔහුට හැඟුණි….”

“විශ්ව සිය උපකල්පනය මොලීට පැහැදිලි කළත් ඔහුගේ සිත එකතැන නොමැති බව මෑතක දී හඳුනාගත් මයික්ට පවා  වැටහී තිබුණි….”

“විශ්ව, මට ඔයාව අද හවස හමුවෙන්න ඕන….. හවස ලොකු වැඩක් නෑ නේද? ” මොලී කෙලින්ම විශ්වගෙන් ඇසුවේ විශ්වගේ දෑස් දෙස ගැඹූරු බැල්මක් හෙළමින්. මෙතෙක් කිසිම දෑසක් හමුවේ සසල නොවූ විශ්වගේ සිත එකපාරටම ගැස්සුනේ විශ්වටත් නොදැනීම……

“නැහැ… කීයට විතරද? ”

“හවස වැඩ ඉවර වෙලා එන්නකො…. මට ඔයත් එක්ක වැදගත් දෙයක් කතා කරන්න තියෙනවා. ”

“හොඳයි…”

ආචාර්ය පියල් ආරියනන්ද, ජීව අකාබනික රසායන විද්‍යාව අංශයෙන් ඇමරිකාවේ ඩෙලවෙයා විශ්ව විද්‍යාලයෙන් ආචාර්ය උපාධිය ලබා වසර කිහිපයක් එහිම විද්‍යා පර්යේෂකයෙකු ලෙස සේවය කර, ජර්මනියේ BASF රසායන ආයතනයෙහි රසායනික උත්ප්‍රේරක සම්බන්ධයෙන් පර්යේෂණ කළ විද්‍යාඥයෙකි. හරිතාගාර ආචරණයට ප්‍රධාන දායකත්‍වයක් දක්වන කාබන් ඩයොක්සයිඩ් වායුව රසායනික සංයෝගවලට පරිවර්තනය කළහැකි රසායනික පර්යේෂණවලට ඉතා ඉහළ දායකත්‍වයක් දී ඇත. ලංකාවට පැමිණි පසු මයිඩාස් සේෆ්ටි ආයතනයෙහි පර්යේෂණ ප්‍රධානී වශයෙන් ද කටයුතු කර, දැනට MAS Holdings අනුබද්ධ Bodyline ආයතනයෙහි නවෝත්පාදන ප්‍රධානී වශයෙන් කටයුතු කරයි. රැකියාවට අමතරව ඔහු විද්‍යාත්මක Blog අඩවියක් පවත්වාගෙන යන අතර රිවිර -රිවිනෙත කලාපයට සතිපතා ලිපි සපයන විද්‍යා ලේඛකයෙකි. මෙයට අමතරව ඔහු නවෝත්පාදන සහ නිර්මාණශීලීත්‍වය පිළිබඳව දේශන සහ වැඩමුළු ද පවත්වයි.

FREE Shipping on orders over Rs.1500/= Dismiss